जगातील आघाडीची तंत्रज्ञान कंपनी गुगल Google ने पत्रकार, सामाजिक कार्यकर्ते आणि सार्वजनिक जीवनातील प्रसिद्ध व्यक्तींना मदत करण्यासाठी ‘हॅरॅसमेंट मॅनेजर’ नावाचे एक ओपन-सोर्स अँटी-हॅरॅसमेंट टूल सादर केले आहे.
गुगलच्या जिगसॉ युनिटने ओपन-सोर्स अँटी-हॅरॅसमेंट टूलसाठी कोड जारी केला आहे जो सध्या ट्विटरच्या API सह कार्य करू शकतो. यात ट्विट प्रत्युत्तरे लपवणे आणि खाती म्यूट करणे किंवा ब्लॉक करणे तसेच संदेशांची मोठ्या प्रमाणात चाळणी करून त्याचा अहवाल तयार करणे या सुविधा आहेत.
जिगसॉ ही गुगल मधील एक छोटी शाखा आहे जी खुल्या नागरी समाजाकरिता असलेल्या संभाव्य धोक्यांचा शोध घेते आणि त्या धोक्यांवर मात करण्यासाठी उपयुक्त तंत्रज्ञान तयार करते. पत्रकार, नागरी समाज किंवा कार्यकर्ते यांना येणाऱ्या आव्हानांना तोंड देण्यासाठी तंत्रज्ञानावर आधारित उपाय जिगसॉ द्वारे शोधले जातात.
जिगसॉ तर्फे सादर केलेले ‘छळवणूक प्रतिबंध व्यवस्थापक’ हे साधन वापरकर्त्यांना अपमानास्पद संदेशांचा स्वतंत्र अहवाल डाउनलोड करू देईल. गुगल ने आंतरराष्ट्रीय महिला दिनानिमित्त ही घोषणा केली आहे. हे साधन विशेषतः ट्विटर वापरणाऱ्या महिला पत्रकारांसाठी म्हणून तयार केले आहे.
कंपनीने एका पोस्टमध्ये म्हटले आहे की, “आमची आशा आहे की हे तंत्रज्ञान ऑनलाइन छळाचा सामना करणार्या लोकांसाठी, विशेषत: महिला पत्रकार, कार्यकर्ते, राजकारणी आणि इतर सार्वजनिक व्यक्तिमत्त्वे, ज्यांना विखारीपणाचा ऑनलाइन सामना करावा लागतो, त्यांच्यासाठी एक महत्वाचे संसाधन म्हणून उपलब्ध होईल”
आंतरराष्ट्रीय महिला मीडिया फाउंडेशन सारख्या संस्थांनी याचे स्वागत केले आहे. परंतु या नव्या साधनावर काहीजणांच्या नकारात्मक प्रतिक्रिया सुद्धा आल्या आहेत. गुगलचे भाषा विश्लेषण मॉडेल अजून परिपूर्ण नाही. ते कधीकधी व्यंग्यात्मक शब्दांचे चुकीचे वर्गीकरण करते किंवा अपमानास्पद संदेश शोधण्यात अयशस्वी होते. काही लोकांना तर ही एक प्रकारची सेन्सॉरशीप आहे असे वाटते.